Wednesday 21 March 2018


  طريقة عمل الفايش الصعيدي حسب وصفة 
أمي واختي الخبيرة ال بتعمل بيها أحلي فايش. أمي وأختي وحتي أنا بنعملالمقادير بالبركة بس اختي اديتني المقادير دي من خبرة سنين

 المكونات:لبن،سمن، دقيق، سمسم مش محمص كركم
ومحلب، رشه ملح، سكر

الخميرة الاولي
  • إغلي نص كوب لبن وبرديه شويه يعني يكون اسخن من دافي 
  • في نفس الوقت اغسلي برطمان مربي فاضي بميه سخنة وحطي فيه معلقة صغيرة مليانه سمسم  مش محمص
  • اقفلي البرطمان ولفيه ف كوفيه صوف او حتي فوطه مطبخ
  •  وحطيه ف مكان دافي ( انا باحطه ف دولاب السخان)
  • بعد يوم اكشفي عليه. اذا اللبن قًطًع يعني بقي زي حتت جبنه وميه تبقي الخميرة طلعت
الخميرة التانية:
  •  نص كيلو دقيق اعملي حفرة وحطي الخميرة الاولي جواه
  • اعجني مع إضافة ربع كوب لبن دافي مذاب فيه معلقة محلب مطحون
  • اذا قوام العجينة جامد ضيفي لبن دافي تاني حتي تصبح في قوام عجينة الكيكة
  • تترك لتخمر لتتضاعف حجمها
الخبيز
     
  •  في معجن فخار أو بلاستيك حطي باقي ال 5 كيلو دقيق + رشه ملح
  • دوبي 2 كوب لبن دافي مع معلقة كبيرة سكر + كركم حسب اللون ال تحبيه بس لاتكتري
  • حطي الخميرة التانية ف حفرة ف نص الدقيق
  • اعجني بشوية لبن دافي حتي تصبح العجينة ماسكة
  • حطي سمن سايحة دافية شويه شويه وتعجني حتي تصبح العجينة زي الملبن – تقريبا كوب ونص سمن
  • يترك يتخمر ويعلي تقريبا للضعف
 التقريص
  • تاخدي كورة وتبططيهاع صيجان مدهونه سمن
  • ف التقطيع ايدك لازم فيها سمن سايح
  • يترك يخمر ف صيجانه بس اعرفي الأول والتاني وهكذا
  • تسوي في فرن متوسطة من اول صاج للأخير
  • بعد ان يستوي ف الفرن اتركيه يبرد
  • ممكن يتاكل أقراص أو يتقرقش
 القرقشة
 قطعي بالسكينة كل قرص الي شرايح وحطيهم جنب بعض علي صيجان وحطي الصيجان في فرن هاديه لغاية مايتقرقش
وكده يتحط ف اللبن والشاي ويتاكل

وبالهنا والشفا